حبيت اقدم لكم بعض من قصايد البدر الامير بدر بن عبدالمحسن بن عبدالعزيز
واتمنى انها تعجبكم
،
قصيدة : الأرض
تغنت من فنان العرب محمد عبده
انا من هالأرض .. أمي الصحراء .. احضنتني رمالها
وارتويت بطهرها .. أطعمتني تمرها .. وفرشت لي ظلالها
انا من هالأرض اللي مال عيالها .. غيرها أرض
***
عاشقٍ هالرمل .. من خلقني الله .. لين أموت
عاشقٍ جرد الروابي .. والفيافي والخبوت
عاشقٍ طين البيوت .. وفتلة خيوط الوبر
عاشقٍ مافي البشوت .. من عطا وطيب وفخر
***
حبيبتي .. ما أجملك ..
العشق لك .. والمجد لك ..
يكفي القصايد فخر .. لو توصلك ..
امد لك .. زهرة خزامى .. وامد لك غيمة تهامى
وفنجال .. من كف النشامى
يا مجدّله شعرك نفود .. وعالي جبينك هالنجود
وقلبك هضابٍ بينها .. أطهر مكانٍ في الوجود
***
قالوا : البيت الحرام .. قلت : ارضي
قالوا : الشرع الامام .. قلت : ارضي
قالوا : الحب السلام .. قلت : ارضي
قالوا : في مدحك نزود .. قلت : يفداها الحسود
ما على هالارض .. ارض مثل أرضي
,
,
قصيدة : اللّه أحد
تغنت من فنان العرب محمد عبده
الله أحد.. وارضي بعد ..
ارضي تحت ظل الفهد ..
في يدنا كتاب الله .. وفي يدنا الحسام
إخوان من طاع الله .. في حرب وسلام
الله معك يا بلادي ..
حنا الوفا من طبعنا .. وعادتنا طيب وكرم
حكامنا من شعبنا .. هذا اخو وهذا ابن عم
حنا جسد فيه الفهد روح .. حنا بلد للخير نبني صروح
في يدنا كتاب الله .. وفي يدنا الحسام
إخوان من طاع الله في حرب وسلام
الله معك يا بلادي ..
لي ديرةٍ عالي السحاب .. يسكن في شم جبالها
اطهر ثرى .. وأغلى تراب .. تفخر بفعل رجالها
حنا جسد فيه الفهد روح .. حنا بلد للخير نبني صروح
في يدنا كتاب الله .. وفي يدنا الحسام
إخوان من طاع الله في حرب وسلام
الله معك يا بلادي ..
,
,
قصيدة : ربنا واحد
ربنا واحد .. ودربنا واحد ..
كلنا فيصل .. وكلنا خالد ..
كلنا فيصل .. يا سيوف العز .. والمجد الدليل
وكلنا خالد .. بالعمل والجد .. والرأي السديد
حنا الى مات البطل فينا شهيد ..
أحفاد أبو بكر .. وعمر وابن الوليد ..
في جبين الشمس .. حافرٍ اسمه على خد القمر
وفي قلوب الشعب .. خالد ٍ فيصل .. في طول الدهر
حنا الى مات البطل فينا شهيد ..
أحفاد أبو بكر وعمر وابن الوليد ..
،
،
قصيدة : صرخة
صَرخة ذكرتك يَوم.. واليَوم مَوعُود
لجل الوفا لراعيك موفي الوعايد
كنّي بوَقتٍ راح حَاضر .. ومَوجود
فــ يومٍ غشاه المجد .. عله بعايد
وكن (المربع) توه اليوم مشيود
جدران طين.. اطمام سقفه جرايد
قصرٍ بني للعدل .. والطيب والجود
سوره ذرى للناس وفرشه وسايد
يقرا المطوع .. َيرق الحق بسعود
في مجلسٍ راعيه بالوصف كايد
من حوله سيوفٍ وردنٍ وما هود
روس الرجَال اشيوخ كل البدايد
اعداه من طيبه غدو تحته جنود
مَحَدٍ جمع مثله بفعله ضدايد
ستين عام اللي مَضت ياهل العود
ستين مع ستين غرٍ مجايد
ياالله عَسَى قَبرٍ به الطيب مَلحُود
يسقي ثراه من أول الغيث جَايد
اللي جَمعنا سَهل وجبال ونجود
بعد السنين الممحلات الشدايد
يا دارنا عدّك من الناس مَا ورد
خَيرك على الدنيَا قريبٍ ونايد
ويَا دَارنا بابك عن الذّل موصود
وزهر الفخر نبتك قديم وجَدايد
وقت العسر بالدم نوفي لك اعهود
ووقت الرخا بنقول مَدح وقصايد
,
,
قصيدة : عز الوطن
الله الأول وعزك ياالوطن ثاني
لأهل الجزيرة سلام وللملك طاعه
حنا جنود الحرس للقايد الباني
رمحه .. ودرعه .. وكف الشيخ وذراعه
مثل السيوف البواتر وان جنى الجاني
يضرب بها ارقاب من بالدار طماعه
من بان عبد العزيز وصبحنا باني
ما عاد نقبل ظلام الليل لو ساعه
في السلم يشهد لنا عمار الأوطاني
وفي الحرب لأرواحنا للموت بياعه
حنا سياج الوطن عن كل عدواني
والجيش والأمن ساري العز وشراعه
,
,
قصيدة : عشب الفخر
اجمع الرمل في ضلوعك غرام
وإطو زندك على ضلعانها
عانق الرمث وعروق الثمام
واصل خدك على صوانها
أرضك اللي بها البيت الحرام
اشرق النور من وديانها
ربعت بالمحبة.. والسلام
واعشبت بالفخر صمانها
انت في المجد لك راس السنام
وعزة الناس من اوطانها
ارفع الراس يا الحر القطام
واكثر الحمد للي صانها
ديرتك من عشقها ما يلام
ويغضب الله على من خانه
,
,
قصيدة : عقب الفنجال
عقب الفنجال من يرضى المهونه
ومن على حرب العدا قلبه يخونه
وخبّر اللي ما درى انا حرارٍ
من رُبا في عزنا غصب يصونه
عزنا الاسلام هو غايَة فخرنا
فيه سرٌ وجودنا ونموت دونه
ارضنا ارض الذهب وانقى المذاهب
والرجال اللي عهدهم يحفظونه
اصلنا حنٌا العرب واللي سوانا
من ثرانا الخصب قد نبتت اغصونه
هم اعدانا ما قروا التاريخ والا
قد قروا التاريخ لاكن ما يبونه
افرحوا بسكوتنا وغضَة نظرنا
والحكي ما يوفي الدٌاين اديونه
ان صَبرٌنا صبرنا حلم وتروي
ويلهم من جهلنا اللي يجهلونه
ما توحٌدنَا على هَرج ودعاوي
ولا طلبنا غير من ربي المعونه
جمعتنا كلمةٍ اشرق سناها
كم عدوٍ منها عشيت عيونه
ونهج ابو تركي على نهج المعَالي
هو طريق المجد يااللي تدعونه
وحٌد اطراف الجزيرة واحتماها
بالعدل بالسيف بالروح الحنونه
واربعينٍ غٌيروا وجه الليالي
وشادوا البيت الذي هزعت اركونه
رَبع اخو نوره سيوف الحق منهم
كم غريبٍ معتدي هدّت احصونه
ارتوت ارضٍ لنا بإيمان أهلَها
ما بقى شبر بجهلهم تزرعونه
الله أكبر والهدى سُنٌة نَبيٌه
ارجعوا للحق يااللي تعرفونه
,
,
قصيدة : هل التوحيد
تغنت من فنان العرب محمد عبده
من هل التوحيد للقايد سلام ..
للفهد ..
وان دعانا شيخنا الشهم الإمام..
للوعد ..
حدنا الشرقي الوعد ..
دارنا مثل العروس .. وكلنا خطابها
من يبي شمس الشموس .. من يحب ترلبها
مهرها بذل النفوس .. سترها واحجابها
كلمة الله والحسام
لا همى وبل الرصاص .. مرحباً بحتوفنا
ودنا ناخذ قصاص .. أهلنا وضيوفنا
يالعدو مالك خلاص .. تحت ضرب اكفوفنا
لين ترضخ للسلام ..
يا عدو الله .. نويت تستبيح بيوتنا ..
مانت كفوٍ لا هقيت .. دون هذا موتنا ..
وراجعة أرض الكويت كان تسمع صوتنا ..
ورب ذا البيت الحرام .. وغصب عن جيش الظلام ..
شيخنا عمرك يطول .. وللعدو ذل وكمد
القادسية اللي يقول .. جندها من هالبلد
ديرتي دار الرسول .. وانجبت أرضي سعد
فخرنا الدين الحنيف .. وشذرة السيف الرهيف
الله .. الله .. ما سواه .. به نعين ونستعين ..
ما رميت الله رماه .. طاح في اسد العرين
يتبع الطاغي هواه .. ونتبع الحق المبين
ومن مع الله ما يضام ..
[center]